Mbledhja e 8-të përbashkët e Shqipërisë dhe Kosovës zhvilloi punimet në Prishtinë ku u morën vendime të mira për marshalla. Bashkëqeveritarët ranë dakort për nja 19 vendime, marrëveshje dhe memorandume, që do ta bëjnë jetën e shqiptaro-kosovarëve, të ëmbël si ballokume.
Ndërkohë një lajm i papritur vjen nga Vatikani. Sipas një burimi të besueshëm që s’para i zihet besë, konfirmohet se Papa Francesku paska dhënë dorëheqjen.
Zyrtarisht thuhet për motive shëndetsore por nëpër korridoret e Selisë së Shenjtë dihet ashiqare se poshtë veladonit të bardhë, Papa fshihte njëmijë e një të zeza. Pra nuk e kishte kaluar vetingun.
Menjëherë sapo i kishte thënë “tung” Albinit, Kryeministri Rama kishte mbledhur të vetët dhe u kishte komunikuar lajmin mbi dorëheqjen e Papës.
“Nuk ka nevojë për panik. Ja kemi dalë termeteve, pandemive, inceneratorëve, patronazhistëve, luftës në Ukrainë. Por tani detyra jonë është të ndihmojmë në zgjidhjen e krizës në Vatikan dhe tu japim atyre një Bajram” – u tha Rama ministrave që mbanin shënime.
“Deri në zgjedhjen e Papës së ri, karrikja e Franceskut është “sede vacante” pra bosh. Por dikush duhet të vijojë rutinën e vendimarrjes së përditshme. Dikush duhet ti dalë zot, postit më të lartë drejtues në shtëpinë e Zotit” – sqaroi Rama.
Meqënëse për cdo gabim të qeverisë, Kryeministri ja ka vënë fajin gjithmonë vetes, u pa e natyrshme që edhe postin e Papës t’ia ngarkonte vetes, provizorisht derisa të caktohet pasardhësi i Franceskut.
Rama urdhëroi Spiropalin të niste menjëherë nga puna për përgatitjet e duhura për mbledhjen e përbashkët Vatikan-Shqipëri, e cila pritet të zhvillohet në sallën ku mbahen konklavat. Në fund të mbledhjes së përbashkët do të votohet edhe për Papën e ri.
Ndërkohë bëhet e ditur se Kryeministri e ka hedhur poshtë pothuajse pa hezitim, kandidaturën për tu zgjedhur Rama i Romës.
