Biznesi shqiptar si kudo në botë po vuan pasojat ekonomike të pandemisë së koronavirusit dhe të gjithë të punësuarit mezi presin lehtësimin e masave për t’iu rikthyer normalitetit.
Qeveria shqiptare ka lejuar disa biznese ti kthehen punës por duke respektuar masat mbrojtëse. Por vihet re se për të fituar kohën e humbur jo të gjithë po tregojnë kujdes gjatë punës.
Forcat e policisë bëjnë të ditur se kanë arrestuar dy të vetëpunësuar të profesionit grabitës të cilët u kapën në flagrancë duke vjedhur pa maska dhe pa dorashka plastike, duke thyer karantinën dhe duke shkelur masat anti Covid-19.
Dy grabitësit u përpoqën të shpjegonin mungesën e maskave mbrojtëse dhe dorashkave me sebepin se do ti blinin me lekët që do të vidhnin aty, sapo të dilnin nga banesa.
“Nuk na shkon mendja të dalin në rrugë pa maska e dorashka, nuk duam të rrezikojmë të tjerët. Ndërgjegja e pastër dhe përgjegjshmëria ndaj tjetrit është baza parimore e punës tonë” – u shpreh me sinqeritet njëri nga të arrestuarit.
Pyetjes së efektivëve të policisë nëse i kishin larë duart ose të paktën dezinfektuar para se të nisnin procesin normal të vjedhjes së banesës, grabitësit u përgjigjën se nga nxitimi e kishin harruar këtë detaj.
“Kemi dy muaj pa punë dhe kemi harxhuar lekët që vodhëm gjatë Janarit. Jemi në recension dhe duam ndihmë nga qeveria” – u shpreh njëri nga grabitësit duke shtuar se kishin aplikuar për pagën e luftës por nuk kishin marrë ende përgjigje.
“Qeveria duhet të kuptojë se biznesi ynë po përjeton kohë kritike dhe cdo ditë pune për ne është një sfidë më vete. A e dini se sa vështirë është bërë këto ditë karantine të gjesh një shtëpi pa njerëz? – tha një nga grabitësit që mesa duket ishte më i përgatitur filozofikisht.
“Kryeministri Rama ka thënë se “punë ka por s’ka profesionistë”. E pra ne jemi profesionistë por nuk na lënë të punojmë. Ne i qëndruam besnikë vendit tonë dhe nuk e braktisëm duke mërguar në Gjermani si shumë nga kolegët tanë” – deklaroi i indinjuar grabitësi më i vogël në moshë.
Burime nga policia konfirmojnë se mbi dy profesionistët e lirë rëndojnë akuzat e vjedhjes gjatë karantinës pa maska, pa dorashka dhe për më tepër pa respektuar distancën 1.5 metër të caktuar nga OBSH.
